Tombo Turuk

Kala Dima

Penulis : Toni Mbukut

One ca beo manga cengata ata lomes keta eme one caci agu ombeng one joget. Ngasang data hitu hi Ungkes. Hi Ungkes ho’o wekin mancak, ranga lewe, isung ne mongko, agu reba di’a. Loda taung ati de inewai eme ita hi nana Ungkes. Cewen kole hia jomel mu’u koen agu di’a keta bokak koen. Ba’ang toe rentum de anak molas data.

Nia kat manga caci, manga hi nana Ungkes. Sale Lembor caci, salen hi nana. Awo Elar caci , awon hi nana. Eme neho tae gereng te tu’a one caci kat hi Ungkes.
Bo kali manik keta eme caci hi Ungkes. Jipet eme ta’ang, mberes eme paki, lomes eme kelong. Cait minak pacin hi ‘Kala Dima’.

Hi Ungkes ho’o toe hanang ca winan. Gereng te nete beo manga wina diha. Ai co’ob bo, can poli caci, can nitu wina. Co kali ga sale manga caci, sale manga wina. Awo manga caci awo kole manga wina.

Baca Juga :   Empo Rua

“Nana neka nanang kala lupi ngampang kali e agu neka ndai raci lupa lawir”, toing de ema ne hi Ungkes du ca wie. “Ta! Bae apas meut tu’a e. Selera damit uwa taung situ”, wale di Ungkes. “Neka nggempas keta nana, bom bae lehau jaga kid de Mbawa Tara lupi ngampang agu lami kid de Mbawa Rani lupi lawir”, lanjut toing de ema di Ungkes.
“Ole ho’op ngasang hi Kala Dima e, ngoeng larik tabe ce’e ko ngoeng kope tabe ce’e”, paci di Ungkes demeng mese nain.
Hi Ungkes bae betuan toing de ema ne. ‘Kala lupi ngampang agu raci lupi lawir’ ngong te inewai ata manga rona. Toing de ema di Ungkes betuan bo ga kud neka mbele le rona data hi nana Ungkes.

Rapak de ca leso, manga caci sale Wae Wala. O de salen hi nana Ungkes. Cait denge liha do lalong sale Wae Wala. Cewen kole sanggen lalong one mai neteng beo lut one caci hitu. Manga ise Rata Weleng sale mai Rejeng, Tekur Tenduk reba Wenus, Motor laut reba Wangkung, Bintang Kema reba Tengka, Surak edar sili mai Wesa, Songke jok sili mai Popo, Joker Putih, joker Merah agu lalong-lalong sot iwo de.

Baca Juga :   Empo Rua

Do ata naring caci di Ungkes. Cewen keta ata molas. Lepot taung mata lelo caci di Ungkes. Lep one pucu senget dere koen.
Du poli caci, ita li Ungkes cengata inewai ata molas di’a. O de wan maen mata di Ungkes; imus kat hi enu. Le le hi enu, le le hi Ungkes agu tua le mbaru le. Mai hia enu sila kopi. Toe cau mok hi Ungkes, cau mole lime. Poli hitu rebi liha lime de inewai hitu, co kud nganceng nggao. Pas laring nggitun, cain rona di enu.

“Ole pande apas meu e?”, palak data ngara wina. “De nana, sila kopi laku ata rona ho’o. Toe tiba mok hia bo ga rebi mole lime daku”, tombo di enu demeng retang ne.
“O lawa mai taung e!” ciek de rona di enu ho’o. O de mburuk taung lawa do leok mbaru hitu. Toe nganceng losi hi nana Ungkes. “Ata co’o e?”, rei de Kraeng Tu’a Golo. “Ole sila kopi le wina daku ata ho’o ite, toe tiba mok hia rebi mole lime de wina daku kud nganceng nggao”, toi de rona di enu. “Tu’ung ko enu?”, rei de Kraeng Tu’a Golo agu hi enu. “Eng o ema”, wale di enu demeng retang kin.

Baca Juga :   Empo Rua

“Pongo ata ho’o”, ciek de Kraeng Tu’a Golo. Mai lawa do pongo hi Ungkes. Poli hitu weo lise hi Ungkes one langke mese. Rapak de telu leson wa, taung nain hi Ungkes. Cait do inung tuak du caci, tambang toe hang telu leso. Ba’ang toe taung nai ne.

“O…. Kala Dima….. reba di’am… do da’at sial me….”, dere de ema di Ungkes eme tenang mose de anak ne.

Tinggalkan Balasan

Alamat email Anda tidak akan dipublikasikan.

Back to top button